كم سنه مر الفـرح واحنـا خطاوينـا بعـاد=كم سنه وانا انتضر والشوق في قلبي يزيـد
كم سنه وانا ونومي في هواجيـس وسهـاد=كم سنه ماتت بعيني فرحتي والنـاس عيـد
شلت حبك في خفوقي صار لي مشـرب وزاد=طيفك ملازم خيالي كنت اريـد او مـا اريـد
ويش اسوي دام حبك فـي شرايينـي مـداد=وش بيدي وانت تسكن بين قلبـي والوريـد
انكسرت ولنت لك والصعب فينـي والشـداد=وانحنى لك قلبي الـي خابـره قبلـك شديـد
كنت صلب وكنت قاسي كنت انا اهوى العناد=وبعد حبك همت فيك وطاوعك راس(ن)عنيـد
من يلوم الصمت لو خيم على جـوي وسـاد=والفرح فينـي تلاشـا والاغانـي والنشيـد
انطفى جمري بيدي وانتهـى واصبـح رمـاد=وصرت اعيش بدون قلب وبين ذا العالم وحيد
لجل حبك جاتك حروفي مـن اعماقـي تقـاد=ولجل عشقك كل حرف(ن)من لساني لك قصيد
من غرامـك بـان سـري للقـراب وللبعـاد=ومن عذابك ياعذابي صار قلبـي مـن جليـد
لي سنين اتحملـك والعيـن جافيهـا الرقـاد=لي سنين وجور حبـك لافنـي بلفيـن قيـد
كنت لك ملجى ومسكن في السموم وفي البراد=كنت لك حلم وطموح وكنت لك عقل(ن)رشيد
وصرت كل اناس عندك صرت لك كل المـراد=وبعد هذا بعت قلبـي بعتـه بسعر(ن)زهيـد
ليت كل الي عملته مـن قديـم الوقـت فـاد=لكن المعـروف مـا ينفـع ولاضنـه يفيـد
بعد ماجتك الحقيقـه اسمـع العلـم الوكـاد=اسمع علومي وحـاول تبتعـد عنـي بعيـد
بعد تعذيبـك وصـدك والمئآسـي والسهـاد=بعد كل الـي ذكرتـه بسئلـك وش الجديـد؟
الجديد اني بروح اشـوف لجروحـي ضمـاد=واطلب الله يرحم الحالات ذو العرش المجيـد