اعجبتني حتى النخــــــــــــــــاع ..وان شالله تعجبكم^^







على الله يازمن بشكي جروحي والليالي طـوال
عسى راعي العنا ينسى عناه وينشـرح صـدره
..

على الله يازمن بشكي همومي والهمـوم جبـال
تعدّت عاصمـة حزنـي حـدود العالـم بأسـره
..

خساره يالسنين اللي كتبتـي سيـرة الرحـال
فرحت امس وحزنت اليوم بس الخوف من بكـره
..

لساني كم شكى صمته والى منّه حكى ماقـال!
طغى طبع السكوت بسيرة المحروم مـن صغـره
..

سقى الله يوم كنت اضحك وبالي مستريح البال!
ضحوكٍ ماعرفت الحزن وش معنـاه وش قـدره؟
..

وكبرت وكبرت احلامي وصارت قصة الترحال
اماني في مهب الريـح وحلـمٍ ماكتمـل بـدره
..

بعذر اللي مع ايامه جلس يبكي على الاطـلال
تذكـر ماضـي افراحـه اليـن خنقتـه العبـره
..

عزيزه يالعيون اللي حضنتـي دمعـة الرجّـال
حبستي دمعته بين المحاجـر يـوم ضـاع امـره
..

عزيزه يالحروف اللي سكتـي والكـلام يقـال
حكيتي.. ماشكيتي الهمّ وهـمّ القلـب ياكبـره
..

عزيزه ياليدين اللي ثنيتك باصعـب الاحـوال
اكفّك ساعة الحاجـه وامـدّك ساعـة القـدره‍!
..

وعزيز النفس لو يصبر على صبر الليالـي نـال
ابصبر والرجل يصبر ومقيـاس الرجـل صبـره
..

انا منهو حمل همّه على راسـه تقـول عقـال!
مجاديف الزمـن دارت عليـه ونَسّـف الغتـره!!
..

وانا منهو فقد صوته وبعض الصوت به مـازال
دعيـت الله يفرّجهـا علـيّ وبحَّـت النـبـره
..

أشيل الحمل عن غيري وحملي صـار ماينشـال
كما الشيخ الهزيل اللي مشيبـه منقـضٍ ظهـره
..

جروحي مزنةٍ منها هطل فيض الشعـر همّـال
سقت جدب العروق اللي تبلـل ريقهـا قطـره
..

وعن حر الزمن صارت حروفي للجروح ظـلال
تذرّت عن هبوب الياس حلمٍ قـد بنـى قصـره
..

عساها للمطر روحٍ بها وادي الظمـا ماسـال
عروق سنينها جفّـت وورّاهـا الزمـن غـدره
..

عساها للمطر روحٍ قضـى مرباعهـا ماطـال
كساها ثوبها الاصفر.. وكانت تلبـس الخضـره
..

على الله ينجلي وقتٍ قضيتـه هـمٍ و غربـال ق
ويشعّ النور في قلبٍ غشى ليـل الظَلَـم فجـره
..

على الله والولـي الله وبامـر الله يزيـن الحـال
ويضحك للزمن قلبٍ مع همومه قضى عمـره.."



..
وسلامتكـــم ....

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]


[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]


قصيده جميله للغايه

صح لسانك و لسان قايلها

تقبلي مروري في متصفحك

تحياتي سفير قحطان


[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

يا هلا فيك وبمرورك ..نورت

كلماتك حلوه وربي ومره حلوووووووووووه حتى النخاع على قولتك

تقبلي مروري