ليش صارت نظرتك صاحبي نظرة عيـوف=وفي حياتي صاحب ما طعنتـك فـي قفـاك
كيف تسمع هـرج واشـي وهـذارٍ زهـوف=وانت ما شافت عيونـك ولا لمسـت يـداك
كنت أحسبك مسندي يـوم تشتـد الظـروف=بس يا ذيب الخـلا وش ورا جـرة عـواك
أعرف أنك لا بغيـت العشـا تقـدر تحـوف=وانتبه يا ذيب يوجعك بطنـك مـن عشـاك
جيت أدور حـق مبغـا شفاعـه ومعـروف=جيت أوضح ما حصل من خطـا هـذا وذاك
قلت شوف الحق واضح... وكنـك مـا تشـوف=مير أنا مدري علامـك ولا دري وش بـلاك
وين ضحكـات الثنايـا وصفقـات الكفـوف=يوم أعبر عن شعـوري وحسسـك ابغـلاك
صرت في موقفك مثل النقاط ابـلا حـروف=عرفتنـي مسـتـواي الكـبـير ومسـتـواك
وشفت في موقفك عله وفي شمسـك كسـوف=وشفت في حاجبك تعبير واضح عن رضـاك
قلت أفارق عنك وأقفـي بتعريـض الكتـوف=بعد خابت هقـوة اللـي عنـا يمـك وجـاك
وش شعورك يوم لفت الضلوع العوج لـوف=وش شعورك تعترف في خطا ما هو خطـاك
ولا تضيع إلا حقوق الزلايـب والضعـوف=ويلزمك تعرف (ثواب) ابطريقه محتراك
لا تحسبنـي بتجريحـك القاسـي عــزوف=وقفتـي هـي وقفتـي مـا يغيّرهـا جفـاك
ولا يداوا الجرح فيني شعـورك بالحسـوف=مير يا جرحـي تـرا البعـد والفرقـا دواك
وخاطري يا هيه لا تحسبـه خاطـر هنـوف=تكسره أو تجبـره مثـل مـا يبغـا هـواك
خاطري خاطـر بعيـد المرامـي والشفـوف=واملك الرجـال بالجـود والطيـب امتـلاك
وجعل يبتر عظم ساقي من ارهاف السيـوف=لو اشوف الموت ما خضع لمثلـك أو سـواك
لـو تفرشنـا الجريـد وسكنـا فالكـهـوف=(عهد) يا قلبي لداويـك وابـلا مـن بـلاك
زود بعنـادك وزود التصـدي والـوقـوف=يـا بلغنـا قمـة العـز يـا نهلـك هـلاك
ولا نعيش أبذل والقلب مايدخله خوف = والفنا والموت واحد هنا...ولا هناك.
مـا نحّـول مـن سنـام المعـزه للـردوف=ولا يخالط ريحة العـود الأزرق عـود راك
يالكتاب اللي جعلتك علـى الـرف أمحـذوف=ويش تعني غير رسم الغـلاف اللـي زهـاك
لا حقيقة واضحـة لا معانـي لا وصـوف=من خطاي أني قريتك وأخطـا مـن قراك