خناجر صمت

$قيدي مو سلاسل$ · 08-11-2008

حَرَقْها / ذابت انفاسي / حَرَقْهـا
وكضّ الريق من هم(ن) طرقْهـا
تلـوّى بالحشـا واستـلّ قلبـي
بـلا دستـور وعروقـي فَرَقْهـا
اليا مني بغيـت أشهـق زفرنـي
وانا لامـن زفرتـه مـا شهقْهـا
على المله ترى شوقـي طبيعـه
وجا شوق(ن) على شوقي طبقْها
وانا مكنون سـدّي ضـام عينـي
غزير الدمع هـو سبّـت غرقْهـا
خناجر صمت وش عذر الشفايا ؟؟
تساوت له وفـي صـدره زرقهـا
وسقت اكبـر مشاريـه المـوده
على صبري وقال الصبـر سقْهـا
ثمان شهـور اعذّرلـك واجاهـد
ولا عيّنـت مـا يبـرد عرقْـهـا
تعزويت القوافـي يـوم صكّـت
هواجيسـي بـدى يلعـج برقْهـا
على صم الحنايا فـاض حزنـي
تغشوانـي وهـي حتّـت ورقْهـا
خريف الوصل وفصـول الامانـي
على رجـواه وسنينـي سرقْهـا
ألا يـا طـول ليلـي يـوم خيّـم
يكحَل شمسهـا واعمـى شفقْهـا
صرخت بغربي اللوعـه وجـاوب
شمال الخوف والشرقـي سبقْهـا
جنوبي يا جنوبي مـا هقيـت (ال
جهات) الاربعـه تخلـف نسقْهـا
ألا يـا ونتـي ونـة ثـمـان(ن)
خفيف الريش لا مـاج وصفقْهـا
على سود المخالـب سـم خالـه
اليـا خالـط ثناديهـا سحقْـهـا
أون وونتـي ونـة خـلـوج(ن)
تـرزّم والزَبَـدْ فـاح وخنقْـهـا
تـولاه النشيـط وشــدّ قـيـده
وبرّكهـا بَعَـدْ م/ احْكَـم حلقْهـا
سبايب جادل(ن) بالزيـن طاغـي
حكايـات التَـرَفْ ربـيّ خلقْهـا
خذى منْه الكـرز لونـه وطعمـه
تفافيـح الغَنَـجْ سيفـه فلقْـهـا
عتيـم الليـل لا قضّـت شعرهـا
أشوف سهيل يركع فـي طبقْهـا
هنوف(ن) بالحلا ما شفت مثلـه
سهوم المـوت بالعيـن وحدقْهـا
وعـود المـوز لا قـام يتهصّـر
تلعثم خوخهـا واحـرج درقْهـا
رهيفة وسطْ مطروق(ن) ظهرهـا
اليا قفّـت تقـول إقْبِـل وذقْهـا
مصابيح الدجى فـي لـبّ نحـره
وعنقه لا شقـح يكـرب وثقْهـا
احبـه والغـلا مـا هـو بكيفـي
لساني غَصْْب عن عقلي نطقْهـا
احبـه والغـلا مخلـوق لاجلـه
دروب الحب عن غيـره غلقْهـا
احبـه والغـلا يرهـج ضميـري
تمكّـن بالمعالـيـق وفهقْـهـا
احبه والغـلا يـا نـاس بلـوى
وانا بلواي من قلـب(ن) عشقّهـا
ا حبـه والغـلا يصعـب علاجـه
طبيبـه مـات واكفانـه حَرَقْهـا

أميرة جدة · 08-11-2008

احبـه والغـلا مـا هـو بكيفـي

رائع ماكتبته لنا

$قيدي مو سلاسل$ · 08-12-2008

تسلمي يالغاليه واشكر مرورك...

أدوات الموضوع
مشاهدة صفحة طباعة الموضوع أرسل هذا الموضوع إلى صديق

خناجر صمت

روآئع أدبية بأقلام كبار الكتآبـ